nl 
es 
en Hopi interes i partisipashon durante dia di registrashon di Rib’e Lugá
Willemstad – Tim di Rib’e Lugá, den kolaborashon ku Servisio di Atmishon, a organisá un dia di registrashon riba djasabra 27 di yüni 2026. Durante e dia di registrashon a duna personanan ku ta interesá den e trayekto e oportunidat pa haña yudansa grátis ku nan registrashon.
Durante e dia, hopi hende a bin prepará ku e dokumentonan rekerí pa por registrá. E tim di Servisio di Atmishon i Rib’e Lugá a brinda asistensia durante e proseso di registrashon. Banda di esaki, e tim tabata disponibel pa kontestá preguntanan personal i spesífiko ku kada un persona tabata tin, i tambe pa duna informashon relevante pa nan situashon.
E kantidat di hende ku a bini na e dia di registrashon ta reflehá e gran interes ku tin pa ku e trayekto di Rib’e Lugá. Rib’e Lugá pronto lo anunsiá otro dianan di registrashon. Personanan ku ta interesá ta wòrdu invitá pa sigui e kanalnan ofisial di Rib’e Lugá pa e siguiente fechannan i otro informashon relevante.
Miéntras ku Rib’e Lugá ta planifiká otro dianan di registrashon, ta importante pa enfatisá ku personanan no mester warda pa registrá. Nan por hasi nan registrashon nan mes via e wèpsait www.ribeluga.cw, sin mester di un intermediario. Si un persona ke haña yudansa ku e proseso, IOM ta ofresé yudansa grátis ku registrashon mediante sita. Mas informashon tokante kon pa hasi un sita ku IOM ta disponibel riba e wèpsait di Rib’e Lugá.
Kiko ta Rib’e Lugá?
Rib’e Lugá ta un trayekto temporal di registrashon i legalisashon destiná pa personanan ku ta permanesé indokumentá na Kòrsou. Via e trayekto aki, personanan ku ta kumpli ku e kondishonnan stipulá por registrá pa un pèrmit di estadia temporal.
Keda informá
Pa mas informashon tokante e trayekto, e rekisitonan i e dokumentonan nesesario, bishitá:
Sigui tambe e kanalnan ofisial di Rib’e Lugá pa informashon aktualisá:
Facebook: Rib’e Lugá
Instagram: @ribe_luga
WhatsApp Channel: Rib’e Lugá – Nos Lugá, Bon Reglá