Servisio di Atmishon ku kambio den servisio

Servisio di Atmishon ku kambio den servisio

Willemstad – Servisio di Atmishon ta informá ku entrante djaluna 3 di febrüari 2025 su bali di informashon tambe lo ta temporalmente ubiká na Lokèt di Pèrmit na Saliña 127 (Eurobuilding). Esaki ta nifiká ku tur kliente ku tin mester di informashon i tambe klientenan ku tin un sita pa tuma stèmpel den pasport, mester akudí na Lokèt di Pèrmit (Vergunningenloket) na Saliña.

Debí na problema tékniko den sala di espera pa kliente, Servisio di Atmishon mester a bini ku kambio di lokalidat pa su bali di informashon. Entrante djaluna 3 di febrüari 2025 klientenan por akudí na Lokèt di Pèrmit pa status di petishon, status di komprobante di petishon, kasonan spesífiko i apelashon. Klientenan ku sita pa tuma título di residensia (stèmpel den pasport), prueba di regreso, baimentu definitivo i voucher di restitushon ta sigui pasa na Lokèt di Pèrmit (Vergunningenloket) Saliña.

Tur korespondensia (pòst) pa Servisio di Atmishon, tambe mester keda entregá na Lokèt di Pèrmit. Orario pa públiko ta di djaluna pa djaweps di 8:00 am pa 3:00 pm i djabièrnè di 8:00 am pa 12:00 pm.

E kambio aki ta trese kuné ku aktualmente Servisio di Atmishon lo no por duna informashon via di telefòn. Por manda mail na info@immigrationcur.org òf manda mensahe via di Facebook/Instagram Admission Office Curaçao.

Servisio di Atmishon ta pidi pa tuma bon nota di e kambio aki . Alabes ta gradisí su klientenan pa e komprenshon i ta sigui traha pa brinda e servisio kustumbrá.