Kranshi

Bo a tuma bo pèrmit di estadia temporal? Si ta asina, bo por traha un sita via e página aki pa inskribí bo mes na Kranshi, i despues hasi traha un sita pa buska bo dokumento di identidat, sédula.

Esaki ta tuma lugá solamente via sita.

Presentá personalmente

Ora di inskribí na Kranshi i ora di buska bo dokumento di identidat (sédula), bo mester presentá personalmente.

Kiko bo mester trese pa inskripshon?

Pa bo sita na Kranshi, bo mester trese e siguiente dokumentonan:

• Un pasport bálido (ku ta kontené e stèmpel di pèrmit di estadia di Organisashon di Atmishon Kòrsou, Toelatingsorganisatie Curaçao);
• E desishon tokante e pèrmit di estadia imprimí;

• Akta di nasementu original, no mas bieu ku 1 aña;
• E adrès korekto (nòmber di kaya i number) aki na Kòrsou.
• Prueba di adrès (pèrmit di residente prinsipal, akta di kompra notario, akuerdo di hür, pèrmit di konstrukshon)

Plania un sita pa inskripshon

Via e módulo di sita, bo por skohe fásilmente un fecha i ora pa bo inskripshon na Kranshi.

Traha un sita pa bo dokumento di identidat (sédula)

Si bo tin 12 aña òf mas i ta registrá den e Registro Sivil di Kòrsou, bo mester ta den poseshon di un dokumento di identidat (sédula). Bo mester traha un sita pa apliká pa un dokumento di identidat (sédula).

Ora di apliká pa un dokumento di identidat (sédula), mester presentá lo siguiente:

• Un pasport bálido;
• Sèn kèsh òf un karchi di banko pa paga e dokumento di identidat (sédula).

Via e módulo di sita, bo por skohe fásilmente un fecha i ora pa laga traha bo dokumento di identidat (sédula) na Kranshi.