Bon biní na Rib’e Lugá

E trayekto Rib’e Lugá ta un trayekto di registrashon i legalisashon práktiko i fásil ku ta duna abo, komo persona indokumentá, e posibilidat pa registrá pa un pèrmit di estadia temporal, basta ku bo ta kumpli ku e kondishonnan.

Konteksto históriko i regional

Migrashon ya pa hopi tempu ta forma un parti importante den desaroyo di Kòrsou. Den transkurso di añanan, diferente fluho di migrashon for di Karibe, Oropa i Amérika Latino a kontribuí na diversidat kultural, sosial, i ekonómiko di nos isla.

Awe ainda, Kòrsou ta keda destinashon importante pa migrantenan for di den region. Faktornan manera kondishonnan sosial-ekonómiko, relashonnan familiar i serkania geográfiko ta hunga un papel importante den esaki. Ademas, instabilidat polítiko i ekonómiko den paisnan manera Venezuela, Haiti, Jamaica, República Dominikano i Colombia a kontribuí na un oumento di migrashon pa Kòrsou den e últimonan dékadanan.

Komo kontesta riba fluhonan migratorio di den pasado, vários proseso di legalisashon a wòrdu implementá, inkluyendo e Akuerdo di Brooks Tower i e programa Integrashon Responsabel. Aunke e prosesonan aki a ofresé un solushon pa algun di esnan envolví, nan no a resolvé e asuntu di residensia iregular kompletamente.

E asuntu di personanan indokumentá ta toka diferente área di polítika, inkluyendo:

– Maneho di migrashon;

– Ekonomia;

– Desaroyo sosial;

– Salubridat públiko;

– Órden i seguridat públiko.

Debí na falta di datonan konfiabel i aktualisá pa loke ta trata e grandura i karakterístikanan di e grupo aki, ta difísil pa gobièrnu por formulá polítika efektivo i orientá riba futuro.

Aplikashon pa Rib’e Lugá: tres propósito di estadia

Bo por apliká pa Rib’e Lugá a base di tres propósito di estadia. Kada propósito di estadia tin su mes kondishonnan i dokumentonan nesesario.

1. Propósito: Empleo

E propósito di estadia akí ta destiná pa bo si bo ta traha pa un dunadó di trabou. E dunadó di trabou mester kompletá un deklarashon di garantia i un deklarashon di dunadó di trabou pa bo.

2. Propósito: Negoshi propio/ Empresario independiente

E propósito di estadia aki ta destiná pa bo si bo tin intenshon di kuminsá òf kontinuá bo propio negoshi komo empresario independiente òf empresario individual na Kòrsou.

3. Propósito: Re-unifikashon di famia òf formashon di famia

E propósito di estadia akí ta destiná pa bo si bo ta miembro di famia i bo ta dependiente di e aplikante prinsipal, manera:

• E kasá di e aplikante prinsipal;
• E yu menor di edat (te ku 18 aña di edat) di e aplikante prinsipal;
• E yu (di 18 pa 27 aña) ku ta studia i ta finansieramente dependiente di e aplikante prinsipal.

Durashon di e pèrmit di estadia

E pèrmit di estadia ku ta keda otorgá den e trayekto di Rib’e Lugá ta di karakter temporal.

• Riba e promé petishon, normalmente un pèrmit di estadia temporal ta keda otorgá pa un periodo limitá di 1 pa 3 aña, ku eksepshon di e propósito di estadia “propio negoshi”.

E derecho di estadia semper ta mará na kumplimentu ku e kondishonnan mará na e pèrmit di estadia temporal. Si no kumpli ku e kondishonnan aki, e pèrmit por keda revoká.

Pa mas informashon tokante e durashon i kondishonnan pa kada propósito di estadia, por fabor bishitá e siguiente páginanan:

• Propósito di estadia Empleo
• Propósito di estadia Negoshi propio / Empresario independiente
• Propósito di estadia Re-unifikashon di famia òf formashon di famia