Propósito Reunifikashon Familiar/Formashon di Famia

E trayekto Rib’e Lugá ta ofresé e posibilidat pa apliká un pèrmitdi estadia temporal pa miembronan di famia dependiente ku e propósito di Reunifikashon familiar/Formashon di Famia. Ku e pèrmit aki, bo por biba legalmente na Kòrsou i hasiendo esaki, gobièrnu ta kontribuí na trese famianan huntu i/òf mantené nan huntu.

Solamente petishonnan ku ta entregá di akuerdo ku e prosedimentu preskribí, ku pago di e tarifanan i gastunan atministrativo, via e portal digital, lo keda konsiderá.

Ken ta bini na remarke?

E siguiente miembronan di famia dependiente por bini na remarke:

• E kasá di e aplikante prinsipal;
• E yu menor di edat (te ku 18 aña di edat) di e aplikante prinsipal;
• E yu (di 18 pa 27 aña) ku ta studia i ta finansieramente dependiente di e aplikante prinsipal.

Kondishonnan

Bo por apliká pa un pèrmit pa e propósito di reunifikashon familiar/formashon di famia si bo ta kumpli ku e siguiente kondishonnan:

• Bo a yega Kòrsou promé ku 13 di novèmber 2025;
• Bo no ta forma un menasa pa órden òf seguridat públiko;
• E solisitante prinsipal tin (òf ta eligibel pa) un pèrmit di estadia i tin sufisiente medio medio finansiero di sosten;

Pa por proba ku bo ta kumpli ku e kondishonnan menshoná i di akuerdo ku bo propósito di estadia “reunifikashon familiar/formashon di famia”, bo mester entregá sierto dokumentonan segun e maneho di Rib’e Lugá. Mira e tab di Lista di Rekisitonan pa e dokumentonan nesesario.

Durashon di e pèrmit:

Si bo skohe e propósito di reunifikashon familiar/formashon di famia, bo tin e opshon pa skohe un pèrmit di estadia temporal di 1 pa 3 aña.

• 1 aña XCG   655,–
• 2 aña XCG 1280,–
• 3 aña XCG 1905,–

Maneho spesífiko pa menor di edat (te 18 aña)

E maneho pa menor di edat (te 18 aña) ta enfoká riba garantisá nan seguridat, stabilidat i kontinuidat den situashon di kuido. Mirando e posishon vulnerabel di muchanan, petishonnan entregá pa menornan òf na nòmber di esakinan lo keda tratá ku prioridat, teniendo kuenta ku e situashon personal di e menor.

Petishonnan di mayor (tata i mama) di muchanan menor di edat tambe lo keda evaluá kuidadosamente. Hasiendo esaki ta pone énfasis riba e importansia di union den famia, miéntras ta evitá mas tantu posibel ku muchanan ta keda separá for di nan mayornan.

Maneho spesífiko pa loke ta trata miembronan di famia dependiente (18 te ku 27 aña)

Muchanan ku efektivamente ta forma parti di e famia i ta mayor di edat (18 pa 27 aña) por bini na remarke pa un pèrmit basta ku:

• A demostrá ku e yu ta studia ainda;
• I ku e ta finansieramente dependiente di su mayornan.

Relashoná ku esaki ta evaluá kuidadosamente si e mucha ta inskribí na un skol sekundario òf un programa di edukashon avansá rekonosé na Kòrsou.

Dokumentonan nesesario pa entregá e aplikashon

Ora di entregá e petishon, mester suministrá e siguiente dokumentonan:

• Formulario digital via e portal;
• Prueba di entrada promé ku 13 di novèmber 2025
• Prueba di pago di tarifa i retribushonnan;
• Kopia di pasport di e miembro di famia pa ken e pèrmit ta destiná;
• Akta di nasementu, no mas bieu ku 1 aña i ku un apostiya;
• Deklarashon di Bon Kondukta, Verklaring Omtrent het Gedrag (VOG), for di edat di 18 aña (no mas bieu ku 3 luna);
• Deklarashon di dunadó di trabou huntu ku un kopia bálido di e dokumento di identidat di e dunadó di trabou di e solisitante prinsipal, ku un stampia di XCG. 10.00;
• Deklarashon di garantia ku un stampia di Cg. 10.00;

Si ta kasá:
• Akta di matrimonio ku apostiya.

Si ta yu:
• Si ta aplikabel, prueba di rekonosimentu, tutela òf outoridat di mayornan (ku apostiya  òf legalisashon);
• Prueba ku e representante legal tin outoridat di mayor riba e yu;
• Si ta aplikabel, un kopia di pasport bálido di e otro mayor ku ta keda atras, huntu ku un deklarashon notarial di indikando ku e mayor no tin opheshon;
• Si solamente tata òf mama tin outoridat di mayor, un kopia di e desishon di Korte;
• Deklarashon di skol.

Na momento di entregá bo aplikashon, bo ta sigui e siguiente pasonan:

1. Entregá e aplikashon online via e portal digital di Rib’e Lugá, inkluso subi tur dokumento nesesario.
2. TO ta evaluá e petishon di pèrmit di estadia entregá;
3. Risibí un desishon di aprobashon òf rechaso. Den kaso di un desishon di aprobashon:
4. Pago di depósito;
5. Sera un seguro médiko lokal pa (por lo ménos 1 aña) e durashon di e desishon;
6. Traha sita pa rekohé e pèrmit di estadia temporal. Pa traha un sita [klik aki];
7. Entregá e dokumentonan nesesario na momentu di emishon;
8. Inskribí na Kranshi. Bo mester traha un sita pa esaki;